د ځمکو له غصب څخه د مخنیوي او د غصب شویو ځمکو د استرداد کمېسیون د رهبرۍ ناسته جوړیدل
د ځمکو له غصب څخه د مخنیوي کمېسیون رهبرۍ د عدلیې وزیر، د کمېسیون رئیس او د اراضۍ او د امارتي ځمکو د استرداد وزارت وارسي کوونکی محترم شیخ الحدیث مولوي عبدالحکیم شرعي په مشرۍ په یوې ناسته کې د امارتي ښارګوټو موضوع او ځینې نور مهم موضوعات تر بررسۍ لاندې ونیول.
په دې ناسته کې چې د جمادی الأولی د میاشتې په ۲۰مه نېټه د سهشنبې په ورځ د عدلیې وزارت په مقر کې ترسره شوه، د کرنې، اوبو لګولو او مالدارۍ وزیر محترم مولوي عطاءالله عمري، د کور او ښار جوړلو وزیر محترم مولوي نجیب الله حقاني، د سرحدونو، قومونو او قبایلو وزارت معین محترم مولوي عنایت الله شجاع، د چارو ادارې د عمومي ریاست مرستیال، د سترې محکمې استازي محترم مولوي محمد حماد، د کرنې وزارت د اراضۍ رئیس محترم مولوي محمود مظلوم، د امارت د قضایاوو عمومي رئیس او د کمېسیون سکرتر محترم احسان الله وثیق او نورو مسؤولینو ګډون درلود.
د ځمکو له غصب څخه د مخنیوي کمېسیون رهبرۍ په دې ناسته کې د هغو ښارګوټو موضوع چې اختصاصي محکمو پرې د امارتيتوب پرېکړه کړې، یو شمېر امارتي ادارو ته د ځمکو د لېږد او ځینو نور موضوعاتو په اړه بحث او خبرې وکړې.
په دې ناسته کې د هغو ښارګوټو د ځمکو په اړه د مؤظفې کمېټې راپور وړاندې شو چې د اختصاصي محکمو د فیصلې له مخې امارتي ثابت شوي او د کمېسیون رهبرۍ په دې هکله لازمې لارښوونې وکړې. همداراز کمېسیون یو شمېر امارتي ادارو ته د ځمکې د لېږد موضوع په هکله لارښوونه وکړه چې په دې برخه کې د ځمکو له غصب څخه د مخنیوي قانون د ۱۶ مادې مطابق اجراآت ترسره شي.
