د پکتیا ولایت د استیناف محکمې او د یاد ولایت د عدلیې ریاست ترمنځ د همغږۍ ناسته جوړیدل
د پکتیا ولایت د عدلیې رئیس مولوي محمد رئیس محمدي او له هغه سره مل پلاوي د جمادي الثاني د میاشتې په ۱۹ نېټه د سه شنبې په ورځ د یاد ولایت د استیناف محکمې له رئیس مفتي عبیدالله خالد سره وکتل او خبرې ورسره وکړې.
په دغې کتنه کې چې د عدلیې ریاست او د یاد ولایت د استیناف محکمې ترمنځ د لازیاتې همغږۍ په موخه ترسره شوه، د امارت د قضایاو آمر او د دغه آمریت مسلکي غړو او د پکتیا ولایت د استیناف محکمې نورو مسؤولینو هم حضور درلود.
په دې کتنه کې، د پکتیا ولایت د عدلیې رئیس د عدلیې ریاست او د یاد ولایت د استیناف محکمې ریاست ترمنځ په لازیاتې همغږۍ ټنیګار وکړ او د هغو ستونزو په اړه چې د دغو دواړو ریاستونو ترمنځ د ځینو دوسیو پر مخ وړولو په برخه کې وجود لري، خبرې وکړې. نوموړي د یاد ولایت د استیناف محکمې له ریاست څخه دغو ستونزو ته د رسیدګۍ غوښتونکی شو.
د پکتیا ولایت د استیناف محکمې رئیس هم د یادو دواړو ریاستونو ترمنځ په لازیاتې همغږۍ او همکارۍ ټینګار وکړ او ژمنه یې وکړه چې د یادو ستونزو د لري کولو په موخه به د یاد ولایت له عدلیې ریاست سره همکاري وکړي.
