د هلمند ولایت له عدلیې ریاست څخه ليدنه
د ولایتونو له عدلیې ریاستونو څخه د ليدنې او څارنې په لړ کې، د عدلیې وزارت د مالي او اداري رئیس مفتي فضل هادي ( صاحب زاده) په مشري د بېلابېلو ادارو له رئیسانو او استازو څخه جوړ پلاوي د ۱۴۰۱ کال د وری ۹ د سه شنبې په ورځ هلمند ولایت ته سفر وکړ.
دغه پلاوي، په سر کې د دې ولایت د عدلیې ریاست له بېلابېلو څانګو څخه لیدنه وکړه او د دې ریاست د کارکوونکو د مسلکي او اداري کړنو څرنګوالی وڅاره او وڅېړه. یاد پلاوي د دې ریاست د کارکوونکو ستونزې واورېدې او د هغو د حل په منظور لازم لارښودونه وکړه.
یاد پلاوي په مرکز او ولسوالیو کې د عدليې ریاست تشکیل او تعیینات هم و ارزول.
همداراز دغه پلاوي د هلمند ولایت د والي له مرستیال سره وکتل او د حقوقو او د امارت د قضایاوو په برخه کې د عدلیې ریاست ستونزې ورسره شریکې کړې.
د هلمند ولایت د والي مرستیال ژمنه وکړه چې د عدلیې ریاست ستونزو ته به رسېدنه وکړي.
