د هرات ولایت د عدلیې رییس د دغه ولایت د زرګرانو د اتحاديې له استازو سره وکتل
د هرات ولایت د عدليې رییس الحاج مولوي یار محمد جانان خادمي د صفر المظفر میاشتې په ۲۵ نېټه د چهارشنبې په ورځ د دغه ولایت د زرګرانو د اتحاديې له یو شمېر استازو سره وکتل.
په دغې کتنه کې، د هرات ولایت د زرګرانو د اتحاديې استازو د یادې اتحاديې ستونزې او ننګونې له عدليې رییس سره شریکې کړې.
هغوی له عدليې ریاست څخه وغوښتل چې د دغې اتحاديې د اساسنامي پر مطابق ټاکنې ترسره کړي او وړ کس دې د اتحاديې د رییس په توګه تعیین کړي.
د هرات ولایت د عدليې رییس د دغې اتحاديې د استازو د ستونزو او وړاندیزونو له اوریدو څخه وروسته هغوی ته لارښوونه وکړه چې د ټولو زرګرانو په موافقه لویه غونډه جوړه او د خپل رییس او مدیره هيئت دې وټاکي او د اتحاديې جواز چې قانوني موده يې پای ته رسیدلې هم نوی کړي.
هغه زیاته کړه که چېرې د لويې غونډې له لارې مطلوبه پایله ترلاسه نه شوه، خپل استازي دې د اتحاديې د ریاست له پاره کانديد کړي ترڅو د اتحاديې د اساسنامې او د هیواد د نورو نافذ شوو قوانینو پر مطابق د دغه ریاست د انسجام آمریت تر نظر لاندې تصمیم ونیول شي.
