د ننګرهار ولایت د عدلیې رییس ددغه ولایت د خیریه بنسټونو له مسوولینو سره وکتل
د ننګرهار ولایت د عدلیې رییس مولوي فاتح الله فاتح د ربیع الثاني میاشت په ۱۵ نېټه د پنجشنبې په ورځ ددغه ولایت د خیریه بنسټونو له مسوولینو سره وکتل.
په دغې ناسته کې له اړونده اساسنامې سره سم د خیریه بنسټونو د فعالیتونو، اړمنو له پاره د مرستو رسولو او د خوراکي توکو د وېش په اړه بحث او خبرې وشوې او له خیریه بنسټونو څخه وغوښتل شول چې د مرستو د وېش په مهال ددغه ریاست د انسجام ریاست ته خبر ورکړي.
په دغې ناسته کې د عدلیې رییس د خیریه بنسټونو مسوولینو ته سپارښتنه وکړه چې په لومړي ګام کې ددغه ولایت له واقعي مستحقینو او اړمنو سره مرسته وکړي.
د خیریه بنسټونو مسوولینو د عدليې له رییس څخه مننه وکړه او ژمنه یې وکړه چې د هغه له لارښوونې سره سم خپل فعالیتونه پرمخ وړي او د عدليې ریاست د استازي په حضور کې به مرستې وویشي.
