د میدان وردګ ولایت د عدليې رئیس وپېژندل شو او په کار يې پیل وکړ.
د هېواد د عدليې وزیر قانونپوه فضل احمد معنوي میدان وردګ ولایت ته د یوه سفر په ترڅ کې عبدالعلي شریعتي د دغه ولایت د عدليې رئیس په توګه وپېژنده. هغه له یو دولتي پلاوي سره په دغه سفر کې د میدان وردګ ولایت نوی والي هم وپېژنده.
د عدليې وزیر د عدليې د رئیس په توګه د ښاغلي شریعتي د پېژندنې په مراسمو کې چې د دغه وزارت د اداري معین او سیمه ييزو چارواکو په حضور جوړ شوي وو، هغه ته د نوي مسوولیت د مبارکۍ ترڅنګ، د سیمه ییزو ادارو ترمنځ په لازیاتو همغږیو باندې ټینګار وکړ او ويې ویل چې د عدليې وزارت پام ولایتونو ته زیات دی.
د میدان وردګ ولایت د عدليې رئیس هم د عدليې وزارت له رهبرۍ څخه د مننې ترڅنګ، ژمنه وکړه چې د دغه ریاست د لازیات اغېزمنتوب په لاره کې به جدي هڅه وکړي.
ښاغلي معنوي د سیمه ییزو ارګانونو د ادارې، د اقوامو او قبایلو د وزارت او د میدان وردګ د ولایتي شوری له چارواکو سره په دغه سفر کې ښاغلی لونګ فیضان يې د میدان وردګ ولایت د نوي والي په توګه وپېژنده.
هغه د ښاغلي فیضان پېژندنې پرمهال هغه ته د ولایت د منصب د مبارکۍ ترڅنګ وویل چې مونږ باید هڅه وکړو ترڅو خپلو خلکو ته د خدمت وړ وګرځو او د کاري دورې په پای کې خلکو ته د خدمت په لاره کې ښې لاسته راوړنې ولرو.
