د لغمان ولایت د ځمکې د غصب د مخنیوي د تخنیکي هیئت ناسته جوړه شوه
د لغمان ولایت د ځمکې د غصب د مخنیوي د تخنیکي هیئت ناسته ددغه هيئت د رئیس او غړو په حضور سره جوړه شوه او پکې دغه هیئت ته د سپار شویو مسولیتونو په ښه ترسره کیدلو ټینګار، وشو.
یاد شوي هیئت د قرغه یي ولسوالي په صفو خیل ساحه کې د ۳۳.۸۸ جریبه امارتي ځمکې له غاصب سره وکتل او د نوموړي سندونه یې د بررسۍ له پاره واخیستل.
دغه راز یاد هیئت د علینګار ولسوالۍ پروايي ساحې پر ۱۱۲ جریبه کرنیزې ځمکې دعوا درولودونکو سره وکتل او له هغوی څخه يې سندونه وغوښتل. هغوی دغه ځمکه بې له کوم سند څخه خپل څړځای باله چې د هیئت له لوري هغوی ته قناعت ورکړل شو.
دغه راز یاد شوي هیئت له هغو اشخاصو سره چې په تېر نظام کې يې له ښاروالۍ څخه د پیسو په بدل کې د بلند منزل جوړولو په منظور ځمکه اخیستې او وروسته زورواکو پر دغې ځمکه کورونه جوړ کړي، لیدنه وکړه. هیئت د هغوی څرګندونې واوریدې او پریکړه یې وکړه چې د ساحې متصرفین راتلونکې غونډې ته حاضر شي او د دواړو لورو سندونه بررسي شي.
