د لغمان ولایت د ځمکو د غصب د مخنیوي د تخنیکي هیئت د ناستې جوړیدل
د لغمان ولایت د ځمکو د غصب د مخنیوي د تخنیکي هیئت ناسته د ۱۴۴۵ هجري قمري کال د محرم الحرام د میاشتې په ۶ نېټه د یک شنبې په ورځ د یاد هیئت د رئیس او غړو په حضور سره جوړه شوه او د یاد ولایت د مرکز اړوند د بصرام کلي یو شمېر مشران په کې وغوښتل شول او له هغوی څخه استحضاري واخیستل شوه چې نور پر امارتي ځمکو کار و نه کړي او نورو ته هم پر امارتي ځمکو د کار اجازه ورنه کړي.
په یاده ناسته کې د علیشنګ ولسوالۍ د شمکت کلي یو تن اوسیدونکی چې له یو بل شخص سره پر ۲ جریبه ځمکه دعوا لري، حاضر شو او خپل غوښتنې بیان کړې. هیئت پریکړه وکړه چې د دعوا لوري راتلونکې غونډې ته وغوښتل شي او د دواړو لورو سندونو په پام کې نیولو سره تصمیم ونیول شي.
په همدې توګه په دغې ناسته کې د یاد ولایت د مرکز اړوند د ګل آرام، پنج پای او درکي کلیو اوسیدونکو عریضه بحث او بررسۍ لاندې ونیول شوه او هغوی ته قناعت ورکړل شو چې د امارتي ساحو سکیچ کیدل او نقشه کیدل د هغوی په خیر دي او له هغوی څخه وغوښتل شو چې له اړوندو انجنیرانو سره هر اړخیزه همکاري وکړي.
دغه راز د یو بل شخص عریضې په اړه چې د یاد ولایت د مرکز په شمتیو کلي کې یو اندازه امارتي ځمکه په اجاره اخیستې او یو شخص د نوموړي د کار خنډ ګرځي، بحث وشو او تصمیم ونیول شو چې یاد مستاجر له منظور شوي قرارداد سره سم پر ځمکه خپل کار ته دوام ورکړي.
