د لغمان ولایت د ځمکو د غصب د مخنیوي د تخنیکي هیئت د ناستې جوړیدل
د لغمان ولایت د ځمکو د غصب د مخنیوي د تخنیکی هیئت ناسته د روژې میاشت په ۱۸ نېټه د یکشنبې په ورځ د یاد هیئت د رئیس او غړو په حضور سره جوړه شوه او تېر اجراآت په کې بیا وکتل شول او د ۱۴۰۲ کال له پاره د عمل پلان جوړولو په اړه هم بحث او د نظرونو تبادله وشوه.
په دغې ناسته کې، یاد شوي هیئت پریکړه وکړه چې امارتي ادارې خپل غصب شوي ملکیتونه هیئت ته مشخص کړي ترڅو د تخنیکي هیئت د ۱۴۰۲ کال د عمل په پلان کې شامل شي. دغه راز، د سلطان غازي بابا د ښارګوټي اړوند د یو تفریحي پارک موضوع چې پریو شخص یې د غصب ادعا شوې وه، بررسي شوه او موضوع د دغه ولایت ښاروالۍ ته راجع شوه.
یاد هیئت د علیشنګ ولسوالۍ له یو تن اوسیدونکې سره چې د امنیه قوماندانې ترڅنګ یې پر ۱۵ جریبه ځمکه تاسیسات جوړ کړي او د څا کیندل یې په کې پیل کړي، وکتل او د نوموړي سندونه یې واخیستل. یاد هیئت د ولسوالۍ د ځمکو مدیریت ته دنده وسپارله چې ساحه له نږدې څخه بررسي کړي.
یاد هیئت د قرغه يې ولسوالۍ د صفوخیل په ساحې کې د دوه کادستري قطعو له متصرفینو سره وکتل او له هغوی څخه یې قانوني سندونه وغوښتل. دغو متصرفینو وویل چې دغه ځمکه د هغوی میراثي ځمکه ده او یاد شوي هیئت هغوی ته استعلام ورکړ ترڅو ځواب یې کړي.
