د فراه ولایت د تخنیکي هیئت ناسته جوړه شوه
دفراه ولایت د ځمکو د غصب مخنیوي د تخنیکی هیئت ناسته ددغه هیئت د رئیس او غړو په حضور سره جوړه شوه او په کې ددغه ولایت د بکواه والسوالی اړوند د مغل آباد موضوع د دعوا دواړه لوري راتلونکې غونډې ته وغوښتل شول.
یاد شوي هیئت ددغه ولایت د قلعه کاه ولسوالۍ اړوند په ګله جوی کې پر مدعا بها ځمکې د دواړو لورو تصرفات بند کړل او ددغه ولایت د مرکز اړوند د چمن روکن او خواجه احمد موضوعاتو په اړه یې پریکړه وکړه چې له دغو ساحو څخه لیدنه وشي.
دغه راز یاد هیئت د انار درې ولسوالۍ په تیغ آب کاریز او خاکسفید ولسوالۍ په خشک آبي کې د اوبو څاه کیندل وځنډول تر څو هیئت له نږدې څخه د ساحې لیدنه وکړي.
تخنیکي هیئت د دغه ولایت فرارود ولسوالۍ ته سفر وکړ او د یادې ولسوالۍ له ولسوال، امنیه قوماندان او مشرانو سره یې وکتل او خبرې یې ورسره وکړې.
یاد شوي هیئت د غصب د مخنیوي مقرره او لایحه او اړوند قوانین هغوی له پاره تشریح کړل او له هغوی څخه یې وغوښتل چې د ځمکو د غصب د مخنیوي په برخه کې له دغه هیئت سره همکاري وکړي.
