د غور او بغلان ولایتونو د تخنیکي هیئتونو ناستې جوړې شوې
د غور او بغلان ولایتونو د تخنیکي هیئتونو ناستې ددغو هیئتونو د رئیسانو او غړو په حضور سره جوړې شوې او هم یادو شویو ولایتونو کې له ځینو ساحو څخه لیدنه وشوه.
د غور ولایت د تخنیکي هیئت په ناسته کې په شنې ساحې او فامیلیو سړک کې د یو شخص نمرې بررسي شوې او پریکړه وشوه چې یو مسلکي ټیم موظف کړل شي ترڅو ساحه له نږدې څخه بررسي کړي.
په دغې ناسته کې په سوخته کلي کې د یو مخابراتي آنتن د پایې په تړاو پریکړه وشوه چې ددغې ساحې زمینداران راتلونکې غونډې ته وغوښتل شي.
یاد هیئت په سنګر کشف کې د مخابراتي آنتن د ساحې په تړاو ساحې ته ولاړ او د آنتن چاپیره ځمکو څخه یې لیدنه وکړه او هم يې د یادو ځمکو جي پي اس واخیست. یاد شوي هیئت ددغې ساحې زمیندارانو ته یې وویل چې هیڅوک د تثبیت شویو ساحو د تصاحب او غصب حق نه لري. دغه راز یاد هیئت له زمیندارانو څخه د هغوی د ځمکو سندونه او مدارک وغوښتل.
په همدې حال کې د بغلان ولایت د ځمکو د غصب د مخنیوي تخنیکي هیئت د قول حمام نساجي ساحې ته ولاړ او دغې ساحه کې یې د امارتي ځمکو له غصب څخه مخنیوی وکړ.
د یادې ساحې خلکو یو ورځ وړاندې د عریضې په ترڅ کې دغې ساحه کې د افرادو او اشخاصو لخوا د امارتی ځمکو د پېرلو او پلورلو په اړه خبر ورکړی وو.
یاد شوي هیئت ساحه کې په حضور سره د قضیې عاملین احضار کړل او له هغوی څخه یې قانوني سندونه او مدارک وغوښل او هم یې هغوی ته استعلام وویشل.
