د غزني ولایت د عدلیې ریاست او د موټر پلورنځيو یو شمېر استازو تر منځ د همغږۍ ناسته جوړه شوه
د غزني ولایت د عدلیې ریاست او د یاد ولایت د موټر پلورنځيو یو شمېر استازو ترمنځ د همغږۍ ناسته د شوال د مياشتې په ۱۸ مه نېټه د چهارشنبې په ورځ، د عدلیې رئيس مولوي مطيع الحق عثمان په مشرۍ او د موټر پلورنځيو د یو شمېر استازو په ګډون د عدلیې رياست په مقر کې جوړه شوه.
په دې ناسته کې چې د عدلیې رياست نورو مسؤولينو هم ګډون درلود، د غزني ولایت د موټر پلورنځيو یو شمېر موضوعاتو په اړه خبرې وشوې او په ترڅ کې یې د عدلیې رئيس ټينګار وکړ چې د موټر پلورنځيو مسؤولين دې خپل ټول معاملات د قانون او اصولو په رڼا کې ترسره کړي، د خپلو فعاليتونو راپور دې له عدلیې رياست سره شريک کړي او له جعل کارۍ څخه دې ډډه وکړي.
په ورته مهال د معاملاتو لارښوونې دفترونو استازو د اصولو مطابق د خپلو فعالیتونو ترسره کولو څخه ډاډ ورکړ او هم یې خپلې یو شمېر ستونزې شريکې کړې او د حل غوښتونکي يې شول، چې د عدلیې رياست له لورې د لرې کولو په برخه کې د همکارۍ ډاډ ورکړل شو.
