د عدلیې وزارت مسلکي معين د ننګرهار ولایت له عدلیې ریاست څخه لیدنه وکړه
د عدلیې وزارت د مسلکي معين، شيخ الحدیث مولوي عبدالکريم حيدر په مشرۍ د یاد وزارت د پلاوي د سفرونو په لړ کې، یاد پلاوي د جمادي الاول د میاشتې په لومړۍ نېټه، ننګرهار ولایت ته سفر وکړ.
د عدلیې وزارت پلاوي د دغه سفر په ترڅ کې د ننګرهار ولایت له عدلیې ریاست څخه لیدنه وکړه او خلکو ته د یاد ریاست د خدمتونو وړاندې کولو څرنګوالی یې له نږدې بررسي کړ.
د عدلیې وزارت مسلکي معین او له هغه سره مل پلاوي د ننګرهار ولایت، عدلیې ریاست له کارکوونکو او مسؤولیونو سره په کتنه کې، هغوی ته د چارو ښه پرمخ وړلو او خلکو ته د خدمت کولو په برخه کې توصیه وکړه او په دې هکله یې لازمې لارښوونې وکړې.
دغه راز پلاوي د ننګرهار ولایت د عدلیې ریاست د کارکوونکو د فعالیت د څرنګوالي په بررسۍ سره، د کاري نیمګړتیاو لرې کولو په برخه کې هم هغوی ته لازمې توصیې وکړې.
په ورته مهال، د ننګرهار ولایت عدلیې رئيس مولوي محمد رئيس محمدي د عدلیې وزارت له پلاوي څخه مننه وکړه چې له دغه رياست څخه یې ليدنه وکړه او د دوی ستونزې یې له نږدې واورېدې. نوموړي زیاته کړه چې دا لیدنه به د کارکوونکو کاري روحیه لا لوړه کړي.
