د عدلیې وزارت سرپرست د غصب شویو ځمکو د سندونو پر دقیقې بررسۍ ټینګار وکړ
د کابل ولایت د ځمکې د غصب د مخنیوي تخنیکي هیئت ناسته د جمادي الثاني میاشت په ۱ نېټه د یکشنبې به ورځ د عدليې وزارت سرپرست او د ځمکې د غصب د مخنیوي او دغصب شوو ځمکو د استرداد کمېسیون رییس شیخ الحدیث مولوي عبدالحکیم شرعي په مشرۍ ددغه وزارت په مقر کې جوړه شوه.
د کابل ولایت د ځمکې د غصب د مخنیوي تخنیکي هیئت غړو په دغې ناسته کې ددغه هیئت د ترسره شوو فعالیتونو راپور د عدلیې وزارت له سرپرست سره شریک کړ.
د راپور پر اساس، دغه هیئت د ملاتره خیل، حاجي نبي (امید سبز)، ملاجاوید، طلايي او المصور ښارګوټو کې او د ګوسفند درې سیمه او د کابل چهار آسیاب کې غصب شوې سیمې تر بررسي لاندې نیولي دي. په دغې ناسته کې په یادو شوو سیمو کې د تصفيې بهیر پر پيل او یو لړ نور مهم تصمیمونه ونیول شول.
په دغې ناسته کې د عدلیې وزارت سرپرست د کابل ولایت د تخنیکي هیئت غړو ته د خپل خبرو په ترڅ کې هغوی ته په کار کې د اخلاص، قاطعیت او جدیت توصیه وکړه.
نوموړي وویل چې هیئت هغو سیمو کې کار ته لومړیتوب ورکړي، چې د خلکو چارې پرې تړلې او د هغو تصفیه ډېره اړینه ده. دغه راز نوموړي د هیئت لخوا د سندونو دقیقه بررسي او له خلکو سره د هغوی نیک چلند په اړه ټینګار وکړ.
د عدلیې وزارت سرپرست د هیئت د غړو وړاندیزونه هم واوریدل او هغوی ته یې ډاډ ورکړ چې کمېسیون به تل د هغوی چوپړ کې و اوسي.
