د عدلیې وزارت د قانون جوړونۍ د چارو انستېتوت مرستیال او د جزائي قوانینو د دیپارتمنت رئیس ور وپېژندل شول
د عدلیې وزارت د قانون جوړونۍ او د علمي- حقوقي څېړنو د چارو د انستېتوت د ریاست مرستیال او د دې ریاست د جزائي قوانینو د دیپارتمنت رئیس چې د دې وزارت د وړاندیز پر بنسټ او د اسلامي امارت د ریاست الوزرا د عالي مقام په منظورۍ ټاکل شوي دي د روان هجري قمري کال د ذوالقعدې د میاشتې په ۲۷ نېټه د یکشنبې په ورځ د یو لړ مراسمو په ترڅ کې د قانون جوړونۍ د چارو د انستېتوت د لوی رئیس مفتي فضل هادي صاحب زاده په واسطه د دې ریاست نورو رئیسانو او کارکوونکو ته ور وپېژندل شول او په کار یې پېل وکړ.
د اسلامي امارت د ریاست الوزرا د عالي مقام د حکم پر بنسټ، محترم مولوي رکن الدین په دوه ېمه رتبه بست کې د قانون جوړونۍ او د علمي-حقوقي څېړنو د چارو دانستېتوت د لوی ریاست د مرستیال په توګه او محترم اشرف خان عظیمي په دوه ېمه رتبه بست کې د دې ریاست د جزائي قوانینو د ديپارتمنت د رئیس په توګه ټاکل شوي دي.
د قانون جوړونۍ د چارو د انستېتوت لوی رئیس محترم مفتي فضل هادي صاحب زاده د دې ریاست د مرستیال او دجزائي قوانینو دیپارتمنت د رئیس د ورپېژندنۍ په وخت کې په ادارې نظام کې د چارو د ښه والي په منظور ټاکنې او بدلونونه یو اصل وباله او د دې ریاست د پخواني مرستیال او د جزائي قوانینو د دیپارتمنت د پخواني رئیس کړنې وستایلې.
هغه د دې ریاست مرستیال او دجزائي قوانینو د دیپارتمنت د رئیس د نویو دندو مبارکي وویله او د هغوی له پاره یې د بریالیتوب هیله وکړه.
