د عدليې وزارت په تېره یوه مياشت کې د ۱۷۲ عريضه ليکونکو له فعالیتونو څخه نظارت کړی
د عدلیې وزارت د انسجام عمومي رياست د معاملاتو لارښوونې او د عريضه ليکونکو د چارو رياست نظارتي پلاوي، د روان کال د قوس(ليندۍ) میاشتې په اوږدو کې په کابل ښار کې د ۱۷۲ عریضه ليکونکو له فعاليتونو څخه نظارت ترسره کړی دی.
د دغه نظارت په ترڅ کې د ۴ تنو عریضه ليکونکو فعاليت درول شوی چې په غيرقانوني بڼه یې فعالیت ترسره کاوه او پاتې نورو عریضه لیکونکو ته د موجودو ستونزو د لرې کولو په برخه کې لازمې توصیې وړاندې شوي دي.
همدارنګه، د معاملاتو لارښوونې او د عريضه ليکوونکو د چارو رياست د تېرې مياشتې په اوږدو کې د عریضه لیکنې د فعاليت د جواز له ۲۵ تنو غوښتونکو څخه ازموينه اخیستې او ۱۱ تنو ته یې د فعاليت نوي جوازونه ورکړي دي. دغه راز په همدې موده کې د ۴۲ تنو عریضه لیکونکو جوازونه تمدي شوي دي.
د عدلیې وزارت د انسجام عمومي رياست په مرکز او ولایتي آمریتونه یې په ولایتونو کې په منظم ډول اړوندې برخې نظارت او بررسي کوي تر څو له غیر قانوني فعاليتونو څخه مخنیوی وشي.
