د عدليې وزارت د مرکزي رییسانو د اداري ناستې جوړیدل
د عدليې وزارت د مرکزي رییسانو اداري ناسته د ربیع الثاني میاشت په ۱۱ ڼېټه د یکشنبې په ورځ د مسلکي معین شیخ عبدالکریم حیدر په مشرۍ او عدلیې وزارت د مالي او اداري معین مولوي عبدالغني فایق او مرکزي رییسانو په ګډون د دغه وزارت په مقر کې جوړه شوه.
په دغې ناسته کې د سرای شهزاده صرافانو په اتحادیه کې د شته ستونزو او د عدلیې وزارت د کارکوونکو د هویت کارت د صادرولو د کړنلارې په اړه بحث او د نظرونو تبادله ترسره شوه.
په یاده ناسته کې د سرای شهزاده صرافانو په اتحادیې کې د دغې اتحاديې له ټاکنو او د نوي رییس له ټاکنې څخه وروسته د رامنځ ته شو ستونزو په اړه مفصل بحث ترسره شو او پرېکړه وشوه چې د یادې اتحاديې له اړونده کمېسیون سره اړیکه ونیول شي او له هغو څخه د دغې اتحاديې د ټاکنو د ترسره کولو څرنګوالی او د پایلې معلومات يې وغوښتل شي ترڅو له هغو سره سم عملي اقدامات ترسره شي.
دغه راز په یاده ناسته کې د عدليې وزارت د کارکوونکو د هویت کارت د صادرولو د کړنلارې په اړه بحث وشو او پرېکړه وشوه چې د عدليې وزارت مرکزي رییسان یاده کړنلاره مطالعه کړي او خپل نظرونو په راتلونکي ناسته کې وړاندي کړي. دغه کړنلاره په ۳ څپرکیو او ۱۵ مادو کې جوړه شوې ده.
