د عدليې وزارت د مرکزي رییسانو اداري ناسته جوړه شوه
د اسلامي امارت د عدليې وزارت د مرکزي رییسانو اداري ناسته د ربیع الاول میاشتې په ۶ نېټه د یکشنبې په ورځ د مسلکي معین شیخ عبدالکریم حیدر په مشرۍ او د دغه وزارت د مرکزي رییسانو په ګډون جوړه شوه.
په دغې ناسته کې، د عدليې وزارت د مرکزي کارکوونکو او اجیرانو د اضافه کارۍ، مرکزي ریاستونو ته د انټرنټ د ویش او د دغه وزارت کارکوونکو ته د لومړنیو صحي مرستو د سیمینارونو د جوړولو په اړه خبرې وشوې او نظرونه سره تبادله شول.
په یاده ناسته کې پرېکړه وشوه چې د عدليې وزارت مرکزي رییسان د هغو کارکوونکو او اجیرانو لست چې د اضافه کارۍ مستحق وي، ترتیب کړي او د اړونده ادارې د اړتیاو سره سم د اضافه کارۍ ساعتونه وټاکي.
همد راز په دغې ناسته کې دفترونو او کارکوونکو ته د رسمي چارو د اجرا کولو په منظور د انټرنټ د ویش په اړه خبرې وشوې او په دغې برخه کې چمتو شوی نوملړ د ناستې رییس او د غړو لخوا وڅېړل شو.
په دغې ناسته کې د صحي لومړنیو مرستو د سیمینارونو د جوړولو په اړه هم خبرې وشوې او په دغې برخه کې د جوړولو په ډول، کارکوونکو ته د لومړیتوب ورکولو برخه کې او دا چې کوم کسان په لومړي ګام کې دغو سیمینارونو ته معرفي شي، اړونده مسوولینو ته لازمې لارښوونې وشوې.
