د عدليې وزارت اداري او مالي معین معرفي شو
مولوي عبدالغني فایق چې د عالیقدر امیرالمومنین حفظه الله د حکم پر اساس د اسلامي امارت د عدليې وزارت د مالي او اداري معین په حیث تعیین شوی د ربیع الاول میاشت په ۲۹ نېټه د سه شنبې په ورځ د یو لړ رسمي مراسمو په ترڅ کې د دغه وزارت مسوولینو او کارکوونکو ته معرفي شو.
د عدليې وزارت د اداري معین د معرفي په مراسمو کې، د دغه وزارت مسلکي معین شیخ عبدالکریم حیدر، د اقتصاد وزارت سرپرست قاري دین محمد حنیف، د ملي دفاع وزارت لوی درستیز قاري فصیح الدین فطرت، د چارو د ادارې مرستیال مولوي سیف الدین تایب، د عدليې وزارت د قانون جوړونې د چارو لوی رییس مفتي فضل هادي صاحب زاده او یو شمېر میلمنو او د عدليې وزارت مسوولینو ګډون کړی وو.
د عدليې وزارت د قانون جوړونې د چارو لوی رییس مفتي فضل هادي صاحب زاده د دغو مراسمو د پرانېستې په وینا کې د عدليې وزارت په استازیتوب یادو مراسمو کې د میلمنو ګډون ته ښه راغلاست وویل او هغه ته يې د عدليې وزارت د نوي معین د ټاکل کېدو مبارکي ورکړه.
په دغو مراسمو کې د ملي دفاع وزارت لوی درستیز قاري فصیح الدین فطرت په تېرو ۲۰ کلنو کې د مجاهدینو د سرښندنو یادونه وکړه او د امنیت تامین او د عدالت پلي کیدل یې د حکومت د بقا له پاره مهم وبلل. هغه زیاته کړه چې د هېواد په کچه ۹۵ سلنه امنیت تامین شوی او د ۱۰۰ سلنې امنیت د تامین له پاره هڅې روانې دي. هغه د هېواد له عدلي او قضايي ارګانونو څخه وغوښتل چې د عدالت د تحقق له پاره لا ډېرې هڅې وکړي.
په دغو مراسمو کې د اقتصاد وزارت سرپرست قاري دین محمد حنیف او د عدليې وزارت مسلکي معین شیخ عبدالکریم حیدر هم د موضوع په تړاو خبرې وکړې او د عدليې وزارت د نوي اداري او مالي معین د تقرر له امله یې هغه ته مبارکي ورکړه.
په دغو مراسمو کې د عدليې وزارت نوي اداري او مالي معین مولوي عبدالغني فایق هم خبرې وکړې او د امیرالمومنین حفظه الله له اعتماد څخه يې د مننې ترڅنګ ژمنه وکړه چې د خلکو د خدمت په برخه کې له هیڅ ډول هڅې او هاند څخه به ډډه ونه کړي.
مولوي عبدالغني فایق وړاندې له دې د بدخشان ولایت والي و او د اسلامي امارت په نورو مهمو پوستونو کې يې هم دندې ترسره کړي دي.
په یادو مراسمو کې، د چارو د ادارې مرستیال مولوي سیف الدین تایب د دغو مراسمو ګډونوالو ته د عدليې وزارت د نوي اداري او مالي معین د ټاکلو په برخه کې د عالیقدر امیرالمومنین حفظه الله حکم قرائت کړ.
