د زابل ولایت د عدليې رییس لیدنه د دغه ولایت د عریضې له لیکونکو سره
د زابل ولایت د عدلیې رییس الحاج مولوي عبدالوارث خلیل د ربیع الثاني میاشت په ۷ نېټه د چهارشنبې په ورځ د دغه ولایت د عریضې له لیکونکو سره د عدليې ریاست په مقر کې وکتل او خبرې يې ورسره وکړې.
دغه ناسته د کلام الله مجید د ایتونو په تلاوت سره پېل شوه او وروسته د عدليې رییس د موضوع په اړه خبرې وکړې او د دغه ولایت د عریضې له لیکونکو څخه يې وغوښتل چې عریضې د اسلامي امارت له اصولو سره سم ولیکي.
هغه زیاته کړه چې عریضې کې باید د عارض او معروض علیه مکمل شهرت، د عریضې موضوع، د مدعی بها د اربعې حدود او د عریضې قیمت ولیکل شي.
دغه راز نوموړي د دغه ولایت د عریضې له لیکونکو څخه وغوښتل چې د عریضې لیکونکو اتحادیه جوړه کړي او د معاملو د لارښوونو په کارونو کې مداخله ونه کړي.
په پای کې د عریضې لیکونکو د زابل له عدليې رییس څخه مننه وکړه او ژمنه يې وکړه چې د عدليې رییس په سپارښتنو به عمل وکړي.
