د زابل د عدلیې رئیس د معاملو د لارښوونې له مسوولینو سره وکتل
د زابل ولایت د عدلیې رئیس مولوي عبدالوارث خلیل، د ۱۴۰۱ د وري په ۲ مه د سې شنبې په ورځ د هغه ولایت د معاملو د لارښوونې د دفترونو له مسوولینو سره د عدلیې ریاست په مقر کې وکتل او خبرې اترې وکړی.
دغه ناسته د معاملو د لارښوونې د دفترونو د ستونزو د حل په منظور ترسره شوې وه او په هغې کې پرېکړه وشوه چې هر هغه شخص چې غواړي د معاملو د لارښوونې دفتر پرانېزي، لومړی باید له عدلیې ریاست څخه د فعالیت جواز ترلاسه کړي او د معاملو د لارښوونې هغه شمېر دفترونه چې د هغو د جواز موده پایته رسیدلی باید د هغو د جواز په تمدید باندې اقدام وشي.
په دې ناسته کې همداراز پرېکړه وشوه چې د معاملو د لارښوونې دفترونه باید خپلې ټولې معاملې په هغو کتابونو کې درج کړي چې د هغوی ته د عدلیې ریاست لخوا ورکړل شوي او مالیات یې په خپل وخت تصفیه کړي.
