د دوو قوانینو طرحې د قوانینو کمیټې په غونډه کې وڅېړل شوې
د بازرس ادارې د قانون او بریښنايې معاملو او د بریښنايې لاسلیک د قانون طرحې د کابینې د قوانینو کمیټې په غونډه کې چې د کمیټې د رئیس او د جمهور رئیس د دوه یم مرستیال محمد سرور دانش په مشری جوړه شوې وه، وڅېړل شوې.
په دې غونډه کې چې د زمري په ۲۶ نېټه د یکشنبې په ورځ جوړه شوه، د عدليې وزیر ډاکتر عبدالبصیر انور د بازرس ادارې د قانون د طرحې په باره کې معلومات ورکړل او د غونډې غړو هم د دې قانون د طرحې په برخه کې خپلې نظريې طرحه کړې.
د بازرس ادارې قانون له اداري فساد سره د مبارزې، روڼتیا او حساب ورکونې د تأمینولو، د بازرس د ادارې د دندو او واکونو د تنظیم، له اداري فساد سره د مبارزې په کار کې د خلکو د مشارکت د زمینې د برابرولو او د هېوادوالو د ډاډ د زیاتوالی او د اداري فساد پر خلاف د مبارزې د بین المللي میثاق د مفادو د رعایتولو په برخه کې، برابر او تنظیم شوی دی
د جمهور رئیس دوه یم مرستیال ټینګار وکړ چې باید له اداري فساد د مبارزې په خپلواک کمېسیون او د پلټنې عالي ادارې او په نورو اړوندو بنسټونو پورې د اړوندو تقنیني سندونو سره په پرتله کې د قانون د دغې طرحې حقوقي ماهیت، د تطبیق ساحه او مادې بررسي شي.
په دې غونډه کې عدليې وزارت مؤظف کړی شو چې په تخنیکي غونډه کې يې له اداري فساد سره د مبارزې له خپلواک کمېسیون سره د بازرس ادارې د قانون د طرحې د تطبیق، استقلالیت او اړیکې ساحه بررسي کړي او زیاتو خبرو لپاره دې د قوانینو کمیټې راتلونکې غونډې ته وړاندې کړي.
په دې غونډه کې دغه راز د بریښنايې معاملو او د بریښنايې لاسلیک د قانون طرحه چې د بریښنايې معاملو او د بریښنايې لاسلیک د معلوماتو، د بریښنايې معاملو د اعتبار ورکولو، بریښنايې لاسلیک او د بریښنايې اړیکو، د بریښنايې معاملو او د بریښنايې اړیکو پراختیا د زمینې د برابرولو لپاره د قانوني چوکاټ د رامنځته کولو د زمینې د برابرولو په منظور برابره شوې ده بررسي شوه
کميټې د دې قانون طرحه تاييد کړه او د عدليې وزارت يې مؤظف کړ چې د مخابراتو او معلوماتي ټکنالوجی وزارت، د احصايې د ملي ادارې او اترا ادارې په شتون په یوه تخنیکي غونډه کې د یاد شوې وړاندیزونه د قانون د طرحې په متن کې تنظیم کړي او هغه دې د پړاوونو د تېرولو لپاره د کابینې غونډې ته وړاندې کړي.
