د دایکندي ولایت د ځمکو د غصب د مخنیوي د تخنیکي هیئت د ناستې جوړیدل
د دایکندي ولایت د ځمکو د غصب د مخنیوي د تخنیکي هیئت ناسته د ۱۴۴۴ هجري قمري کال د شعبان میاشت په ۲۷ نېټه د یکشنبې په ورځ ددغه هیئت د رئیس او غړو په حضور سره جوړه شوه او د مخکنۍ ناستې موضوعاتو څخه بیاکتنه وشوه. ورپسې د زمیندارۍ د تخنیکي هیئت د آمریت له لوري په لزیر کلي کې د شګات الار د ترلاسه شوې دوسيې په اړه، بحث وشو او تصمیم ونیول شو چې له سفر څخه ددغه هیئت د رئیس راستنیدلو پورې د دوسیې بررسي او له یادې ساحې څخه لیدنه وځنډول شي.
په دغې ناسته کې، په سر نیلي ساحه کې د دوه قطعو اړوند ۳۴۰ جریبه ځمکه چې د کمېسیون د مشرتابه له لوري امارتي تثبیت شوې، د ثبت او ساتنې له پاره د زمیندارۍ تخنیکي آمریت ته واستول شوه. دغه راز بند بورلان ساحه کې د سروې ټیم د راپور په اړه بحث وشو او تصمیم ونیول شو؛ هغه اشخاص چې امارتي ساحې یې تصرف کړي جلب کړل شي.
دغه راز په یاده ناسته کې، د هغو استوګنې نمرو په اړه چې د اسلامي امارت د بریالیتوب په لومړیو کې د ښاروالۍ ریاست لخوا ویشل شوې وې، بحث وشو او تصمیم ونیول شو چې له یاد شوي ریاست څخه په رسمي بڼه د هغو د ویشلو څرنګوالي په اړه معلومات وغوښتل شي. د یو بل شخص د دوسيې په اړه هم بحث وشو او تصمیم ونیول شو چې دغې برخه کې له عارض شخص او د ښاروالۍ له ریاست څخه معلومات وغوښتل شي.
