د حقوقي مساعدتونو د ریاست اداري او د پيژندګلوۍ ناسته جوړه شوه
د عدليې وزارت د حقوقي مساعدتونو د ریاست اداري او د پيژندګلوۍ ناسته ددغه ریاست د نوي رییس مولوي حافظ عبدالصمد عمري په مشرۍ جوړه شوه.
دغه ناسته چې د یاد ریاست له کارکوونکو سره د لازیاتې پيژندنې، ددغه ریاست د کاري چارو د چټکتیا او ښه والي په منظور جوړه شوې وه، د کلام الله مجید د څو آیاتونو په تلاوت سره پیل شوه.
دغې ناسته کې د حقوقي مساعدتونو رییس د جهاد له دور څخه د اسلامي امارت تر بریا وروسته د خپل کاري سوابقو په اړه معلومات وړاندې کړل.
یاده ناسته کې، حقوقي مساعدینو هم د هېواد د محکمو او د حقوقي ریاست ترمنځ موجوده ننګونې او ستونزې مطرح کړې او ددغو ستونزو د حل په منظور یې د سترې محکمې له مسوولینو سره د همغږۍ د ناستې د جوړيدو غوښتنه وکړه.
یاده ناسته کې پریکړه وشوه چې د حقوقي مساعدتونو رییس به موضوع د عدليې له وزیر سره شریکه کړي ترڅو شته ستونزې په بنیادي او بنسټیز ډول حل شي.
یاده ناسته کې د حقوقي مساعدتونو رییس ددغه ریاست د دندو او مسوولیتونو په اړه خبرې وکړې او د یاد ریاست د حقوقي مساعدتونو د آمریت او د حقوقي عامه پوهاوي آمریت له کارکوونکو څخه يې وغوښتل چې له وزارت څخه د باندې د توظیف په موده کې خپل توظیفي راپور ددغه ریاست له مقام سره د راپور په ډول وړاندې کړي.
دغه راز نوموړي لارښوونه وکړه چې د یاد ریاست له آمرینو، اداري مدیریت او دوه تنو کارکوونکو څخه ګډ، یوه کمېټه جوړه شي ترڅو د حقوقي مساعدتونو د ریاست اړیکې ددغه وزارت له نورو ریاستونو سره ټینګې کړي.
