د حقوقو د پراختیا نړیوال سازمان د پروژو له مسوول سره د مدافع وکیلانو د رییس کتنه
د اسلامي امارت د عدليې وزارت د مدافع وکیلانو رییس مولوي سید حبیب الحبیب د ۱۴۴۴ هجري قمري کال د رجب المرجب میاشت په ۸ نېټه د دوشنبې په ورځ د حقوقو د پراختیا نړیوال سازمان (IDLO) د پروژو له مسوولې مېرمن ماندا مکوریلا او د هغې له مل پلاوي سره د عدليې وزارت په مقر کې وکتل او خبرې وکړي.
په دغې ناسته کې، دواړو لورو د مدافع وکیلانو د ستاژ له برنامې څخه د ملاتړ په تړاو له دغه سازمان سره د عدليې وزارت د هوکړې او له عدليې وزارت سره د یاد سازمان د راتلونکو مرستو د همغږۍ په اړه بحث او خبرې وکړې.
یاده ناسته کې د مدافع وکیلانو رییس د عدليې وزارت په راتلونکو برنامو رڼا واچوله او یاده برخه کې ددغه وزارت د پالیسیو په اړه توضیحات ورکړل.
دغه راز نوموړي د مدافع وکیلانو د ستاژ د برنامې په اړه د عدليې وزارت د راتلونکو پلانونو په اړه خبرې وکړې او ویې ویل چې عدليې وزارت د مدافع وکیلانو ستونزو ته رسیدګي کړې او کوي. نوموړي د مدافع وکیلانو د ستاژ جوړولو او د هغه معیاري کولو او نورو تخنیکي او مسلکي مسایلو په اړه هغوی ته معلومات ورکړل.
د حقوقو د پراختیا نړیوال سازمان د پروژو مسوولې هم د عدليې وزارت له ټولو برنامو څخه خپل ملاتړ اعلام کړ او پر لازیاتې همغږۍ يې ټینګار وکړ.
