د جوزجان ولایت د ځمکو د غصب د مخنیوي د تخنیکي هیئت ناسته جوړه شوه
د جوزجان ولایت د ځمکو د غصب د مخنیوي د تخنیکي هیئت ناسته د یاد هیئت د رئیس او غړو په حضور سره جوړه شوه او د ځینو مهمو موضوعاتو په اړه په کې بحث وشو او دغو برخو کې لازم تصمیمونه ونیول شول.
په دغې ناسته کې، د تخنیکي هیئت د ۱۴۰۲ کال کاري پلان بررسي شو او د تایید وړ وګرځید او دغه راز له غړو ادارو څخه وغوښتل شول چې ځیني نور موضوعات هم دغه پلان کې د درج په منظور وړاندې کړي.
دغه راز په یاده ناسته کې، مرکزي کمېسیون ته د تخنیکي هیئت یو میاشتنی راپور د استولو له پاره، تایید شو او یاد هیئت له محکمې او د استیناف محکمې څخه د استول شویو دوسیو په اړه د سکرتریت راپور واورید. په پایله کې مشخصه شوه چې په سه شنبه کلي کې ځایي اوسیدونکو امارتي ځمکې، غصب او تصرف کړي او څاه ګانې یې په کې کیندلي او تاسیسات يې په کې جوړ کړي.
د آقچې ولسوالۍ په کول بقال کې هم یو شمېر خلکو د سرې میاشتې ځمکې غصب او تصرف کړي. یاد هیئت مسلکي ټیم ته دنده وسپارله چې لازیاتې څیړنې ترسره کړي او د یادو ساحو اصولي سندونه بشپړ کړي.
دغه راز په یاده ناسته کې په مرنجان، کوکلداش، سه شنبه (ترکستان ښارګوټي)، منګوتي، د افغانګاز تصدۍ، جګدلیک، پمپ خانه کلیو او د خواجه دوکوه، قوشتپه او د جوزجان ولایت د مرکز ولسوالیو ترمنځ د عامه مرعی ځمکې په ساحو کې د غصب شویو امارتي ځمکو د بررسۍ په اړه د توظیف شویو ټیمونو راپورونه وړاندې شول او مشخصه شوه چې د مرنجان کلي په ساحو کې د مرکزي کمېسیون له لارښوونې سره سم ۹۰ سلنه بررسۍ بشپړې شوي او د هغو وروستۍ دوسيې به په نږدې وخت کې دغه کمېسیون ته وړاندې شي.
د یادو ساحو پاتې برخو کې ۵۰ تر ۷۰ سلنه کار پرمخ تللی خو د قضیو د پیچلتیا او د مسلکي پرسونل او تخنیکي تجهیزاتو د کمښت له کبله تر اوسه بشپړ شوي نه دي چې د هغو د بشپړولو برخو کې يې لازمې لارښوونې ورکړې.
