د جوزجان ولایت خیریه بنسټونو سره د همغږۍ ناسته جوړیدل
د جوزجان ولایت له خیریه بنسټونو سره د همغږۍ ناسته، د ذوالقعدې د میاشتې په ۲۳ نېټه د دوشنبې په ورځ د جوزجان ولایت د والي قاري ګل حیدر شفق په مشرۍ او د عدليې رئیس مولوي محمد نظر فایق او د یاد ولایت د خیریه بنسټونو د استازو په ګډون جوړه شوه.
په دغې ناسته کې، د جوزجان ولایت عدليې رئیس، د خیریه بنسټونو استازي معرفي کړل او د خیریه بنسټونو د فعالیت او د هغوی د مرستو او همکاریو د ترلاسه کولو په اړه یې خبرې وکړې. نوموړي وویل چې په اوسنیو شرایطو کې خلک لاسنیوي او مرستو ته ډیره اړتیا لري او باید له اړمنو سره د مرستو رسولو په برخه کې صادقانه عمل وشي.
وروسته د خیریه بنسټونو استازي د کړنو او تطبیق شویو پروژو په اړه خبرې وکړې او تر لاس لاندې برنامو په اړه يې معلومات وړاندې کړل.
په دغې ناسته کې، د جوزجان والي د خیریه بنسټونو له نیکو کړنو څخه قدرداني څرګنده وکړه او له هغوی څخه یې وغوښتل چې حقدار ته حق وسپاري او داسې کار وکړي چې د ولس خیر او د لوی څښتن تعالی رضایت په کې وي.
یاده ناسته په یو لړ بېلابېلو موضوعاتو د بحث او د نظر له تبادلې څخه وروسته د خیر په دعايې پای ته ورسیده.
