د بغلان ولایت له عدلیې رياست څخه د عدلیې وزارت مسلکي معين ليدنه
د افغانستان اسلامي امارت د عدلیې وزارت د مسلکي معين، شيخ الحدیث مولوي عبدالکريم حيدر په مشرۍ د یاد وزارت یوه پلاوي بغلان ولایت ته سفر کړی او د یاد ولایت له عدلیې ریاست څخه یې لیدنه وکړه.
په دې ليدنه کې چې د ربیعالاول د مياشتې په ۵ مه نېټه د یکشنبې په ورځ ترسره شوه، یاد پلاوي له نږدې د دغه رياست د کارمندانو د فعاليتونو له څرنګوالي څخه ليدنه وکړه او کارمندانو ته یې د چارو د ښه پرمخ وړلو او خلکو ته د ښه خدمت کولو په موخه لازمې توصيې او لارښوونې وکړې.
د عدلیې وزارت ياد پلاوی په پام کې لري چې د عدلیې ریاستونو د فعالیتونو د بررسۍ او د یادو ریاستونو له لارې خلکو ته د خدمتونو د وړاندې کولو د پیاوړتیا په موخه د هېواد نورو ولایتونو ته هم سفر وکړي.
