د افغانستان د اسلامي امارت د عدلیې وزارت سرپرست معرفي شو
ښاغلی الحاج مولوي عبدالحکیم شرعی د افغانستان اسلامي امارت د عدلیې وزارت د سرپرست په توګه معرفي شو او په دغه وزارت کې یې کار پیل کړ.
د عدلیې د سرپرست وزیر د معرفي کولو په مراسمو کې د افغانستان د اسلامي امارت یو شمیر لوړ پوړو چارواکو او د عدلیې وزارت کارکوونکو ګډون کړی و.
برنامه د څو مبارکو آیتونو په تلاوت سره پیل شوه او بیا ښاغلی مولوي عبدالحکیم شرعی د عدلیې وزارت کارمندانو ته د ا.ا.ا چارو ریاست مرستیال ښاغلي مولوي انورالحق لخوا معرفي شو.
ښاغلي مولوي عبدالحق په دغه مراسم کې وویل چې د شل کلنې جګړې پای او د هیواد د اشغال پای د افغانستان اسلامی امارت او ملت لپاره لویه بریا ده. هغه زیاته کړه چې پخواني حکومت نه ملي ګټو ته پاملرنه وکړه، نه مذهبي ګټو ته او په فساد کې ډوب و. د هغه په وینا ، د دې حکومت پروړاندې د جهاد کولو پرته بله چاره نه وه.
د افغانستان د عدلیې سرپرست وزیر ښاغلي الحاج مولوي عبدالحکیم شرعی د اسلامي امارت د کابینې جوړیدو ته په اشارې سره وویل چې زموږ دریځ د مبارکۍ ځای نه بلکه د خواخوږي ځای دی، نو زموږ لپاره په بریالیتوب سره دعا وکړئ چی دا مسؤلیت ادا کړو او زموږ ځوریدلو خلکو ته خدمت وکړو.
هغه زیاته کړه چې په عدلیې وزارت کې د هغه تر مشرۍ لاندې ، د کارمندانو پخوانۍ دنده په پام کې نه نیول کیږي، مګر په راتلونکي کې د دوی اخلاص او صداقت په پام کې نیول کیږي. د عدلیې سرپرست وزیر په وینا، د کارمندانو ظرفیتونه به په سمه توګه وکارول شي.
ښاغلي شرعی روښانه کړه چې د عدلیې وزارت ځینې کارمندان او چارواکي به په خپلو دندو پاتې وي او نور به نورو کارونو او مسؤلیتونو ته سپارل کیږي. هغه د دغه وزارت له کارکوونکو او چارواکو وغوښتل چې خپلو دندو او دفترونو ته راشي.
