جوزجان ولایت کې ۱۳۹ جریبه ځمکه امارتي تثبیت شوه
د جوزجان ولایت د ځمکې د غصب د مخنیوي تخنیکي هیئت ناسته ددغه هیئت د رییس او غړو په حضور سره جوړه شوه او په هغې کې پریکړه وشوه چې د هیئت تصمیمونه د اړوندو ادارو لخوا د جوزجان ولایت په کچه عملي شي.
دغې ناسته کې، تخنیکي هیئت د چهلمرد او قنجوغه کليو کې د اشخاصو د ځمکو سندونه بررسي کړل او دواړو کلیو ترمنځ يې ۱۳۹ جریبه ځمکه امارتي تثبیت کړه.
دغه راز هیئت د خاتون قلعه او چهلمرد کلیو ملکانو ته استعلام توزیع کړ او د لا زیاتو معلوماتو راټولولو او ډاډ ترلاسه کولو په منظور چې امارتي ځمکې د اشخاصو لخوا حیف او میل شوي نه وي، له هغوی څخه سندونه وغوښتل.
دغه راز یاد هیئت پریکړه وکړه چې تخنیکي هیئت مرنجان کلي کې د ۷۴ جریبه ځمکې اړوند د وروستۍ پریکړې په منظور چې د هغې د استرداد قرار مخکې صادر شوی وو، ولاړ شي. مخکې هم د هیئت یو همکار مسلکي ټیم سیمه له نږدې کتلې او بررسي کړې ده.
په همدې حال کې، د بدخشان ولایت تخنیکي هیئت د یاد ولایت ځینو سیمو ته ولاړ او دغه ولایت کې يې له غصب شوو سیمو څخه لیدنه وکړه.
یاد هیئت شورآبک کلي کې د څړځای ۱۰ جریبه غصب شوې ځمکې څخه لیدنه وکړه او د هغې له متصرفینو سره يې وکتل او خبرې وکړې. هیئت له هغو څخه سندونه وغوښتل.
دغه راز یاد هیئت د کلیو اوسیدونکو ته یو تعهد لیک د جوړولو له کارونو څخه د ډډې کولو او نور غصب د مخنیوي په منظور وسپارله او له هغوی څخه یې وغوښتل چې تعهد لیک له خپلو سندونو سره راتلونکې ورځ هیئت ته تسلیم کړي.
دغه راز هیئت د بتاش کلي له اوسیدونکو سره وکتل او هغوی ته يې د ځمکې د غصب د مخنیوي کمېسیون او د تخنیکي هیئت د مسوولیتونو په اړه معلومات وړاندې کړل. یاد هیئت ددغې سیمې له خلکو سره د د لعل بدخشان څیړنیز فارم ۱۴۴ جریبه ځمکې په اړه چې کلونه مخکې غصب او ویشل شوي، خبرې وکړې او له یادو اوسیدونکو څه یې سندونه وغوښتل. هیئت تصمیم ونیو چې د هغوی سندونو له ترلاسه کولو څخه وروسته، دغې سیمه کې به عملي کار پیل کړي
