بادغیس ولایت کې څه دپاسه ۳۲ زره او ۶۰۰ جریبه ځمکه د مساحت له تعیین څخه وروسته د کرنې ریاست ته وسپارل شوه
د ځمکې د غصب د مخنیوي تخنیکي هیئت د سنګ آتش ولسوالۍ په پسته لیق کې د چهل ګزي ساحې ته ولاړ او د «لاغري، باغبانان او محمکې» قومونو له مشرانو سره وکتل او د تخنیکي هیئت او د ځمکې د غصب د مخنیوي کمېسیون په اړه یې هغوی ته معلومات وړاندې کړل.
په دغې کتنه کې، خلکو او د قومونو استازو خپل ستونزې له تخنیکي هیئت سره شریکې کړې او مشخصه شوه چې لاغري قوم د شخړې لاندې ټوله ساحه تصرف کړې او نورو قومونو ته له څړځای څخه د استفادې اجازه نه ورکوي.
یاد شوي هیئت مغصوبه ځمکه چې ۳۲۶۰۷.۲۶۱۶ جریبه ده، ولیدله او مساحت کړه. دغه هیئت د شخړې لاندې ساحې له بررسۍ څخه وروسته یوځل بیا له یادو شویو قومونو سره وکتل او ټینګار یې وکړ چې هیڅوک نه شي کولای چې عامه مرعی ځمکه شخصي کړي او ټولو مالداران حق لري چې وښو څخه یې ګټه پورته کړي.
یاد شوي هیئت پر هغوی ټینګار وکړ چې د سرغړونې په صورت کې له سرغړونکو سره قانوني چلند کیږي او لاغري قوم هم ژمنه وکړه چې په راتلونکې کې به د نورو قومونو نه مزاحم کیږي او د عامه مرعی ځمکو له غصب څخه لاس واخلي.
یاده شوې ساحه له تشخیص څخه وروسته خط اندازي او پولې یې تعیین شوې او د کرنې ریاست مسوولینو ته وسپارل شوه.
